ختم المرسلیں ہیں محمد مصطفیٰ ؐ

قابلِ تحسیں شریعت آپؐ کی
ہم پہ لازم ہے اطاعت آپؐ کی

آپؐ ہیں صادق امیں یا مصطفیٰ ؐ!
دنیا میں پھیلی صداقت آپؐ کی

آپؐ احمد مجتبیٰ، خیر الوریٰ
یا نبیؐ! اعلیٰ ہے سیرت آپؐ کی

دستِ شفقت سب پہ رکھا آپؐ نے
ہر کسی پر ہے عنایت آپؐ کی

آپؐ کی قربان جاؤں شان پر
کرتا ہے قرآن مدحت آپؐ کی

ہوتا ہے انصاف ہر اک سے جہاں
عدل کا پیکر عدالت آپؐ کی

جان و دل سے ہوں فدا سرکارؐ پر
بس گئی دل میں محبت آپؐ کی

اُس کو مل جائے گی جنت مومنو!
ہو عطا جس کو شفاعت آپؐ کی

اُنؐ کا بشریٰؔ ہے بہت اونچا مقام
ہو بیاں کیسے فضیلت آپؐ کی

(بشریٰ سعید عاطف۔ مالٹا)