نور کا دیپک جلاتی ہے نماز
روشنی دل کی بڑھاتی ہے نماز
وصل کا پیغام لاتی ہے نماز
اور کلام اللہ سناتی ہے نماز
ہر برائی کو مٹاتی ہے نماز
قدسی بندے کو بناتی ہے نماز
وقت پر کر لیں ادا گر ہم اِسے
سو گناہوں سے بچاتی ہے نماز
سر جھکائیں جب خدا کے سامنے
راہ جنّت کی دکھاتی ہے نماز
جسم میں کرتی ہے پیدا خوشبوئیں
دل میں اطمینان لاتی ہے نماز
برکتیں کرتی ہے پیدا زیست میں
گفتگو رب سے کراتی ہے نماز
جسم میں پیدا کرے تاب و تواں
نظم جیون میں سکھاتی ہے نماز
ہر مسلماں کو بلاتی ہے اذاں
نیک انساں کو بناتی ہے نماز
کرتی ہے اللہ کے نزدیک تر
پیار آقاؐ کا بڑھاتی ہے نماز
(بشرؔیٰ سعید عاطف۔ مالٹا)