• 1 فروری, 2023

شہدائے برکینا فاسو کے نام

کچھ منتظر اپنی باری کے کچھ مولا پر قربان ہوئے
وہ جن پہ ملائک رشک کریں کچھ ایسے بھی انسان ہوئے

ہے رشک بھی ان کی قسمت پرکچھ ان سے بچھڑنے کا غم ہے
اس دردمیں بھی اک لذت ہے غم اور خوشی یک جان ہوئے

اس دین کے ٹھیکے داروں کا سب جوروستم بے مثل رہا
یوں ظلم کی دنیا میں کتنے فرعون ہوئے ہامان ہوئے

تکتے ہو راہ مسیحا کی پر حق سے آنکھیں پھیری ہیں
کیسے کوئی ان کو سمجھائے جو جان کے بھی انجان ہوئے

ہیں قہرِ الٰہی کا مورد جو خالق سے بے خوف ہوئے
اللہ کو ان کی کیا پرواہ جو سرکش نافرمان ہوئے

ہے درسِ محبت کا ہم کو نفرت کا چلن آتا ہی نہیں
حق گوئی ثبات و صبر وفا ہم لوگوں کی پہچان ہوئے

تاریخ گواہ ہے تھوڑے اور کمزور ہی غالب آتے ہیں
قادر کے پیارے ہاتھوں سے ہی فتح کے سب سامان ہوئے

(امۃ الباری ناصر۔ امریکہ)

پچھلا پڑھیں

الفضل آن لائن 17 جنوری 2023

اگلا پڑھیں

ارشاد باری تعالی