ہوا ہے پھر سے خُدا مہربان کہتے ہیں
کہیں پہ اُترا مسیح الزمان کہتے ہیں
تھے آسمان پہ مُدّت سے ڈھونڈتے جس کو
بڑھائی اُس نے زمیں کی ہے شان کہتے ہیں
بنے تھے رہنما رہزن ہوئے تھے بے قابو
پر آئی اب ہے اُسی کی کمان کہتے ہیں
چلا گیا تھا وہ ایمان جو ثریّا پر
زمیں پہ اُس کا بنا پھر مکان کہتے ہیں
ہوا ہے تذکرہ اُس کا کئی صحیفوں میں
ہے پیش کرتا حوالہ، قرآن کہتے ہیں
زمیں پہ پھیل رہا تھا فساد مُدّت سے
زماں نے پھر سے ہے پائی امان کہتے ہیں
لُٹا رہا ہے خزانے علوم کے ہر دم
ہوا ہے فیض کا چشمہ روان کہتے ہیں
پلا رہا ہے وہ جی بھر کے جام پیاسوں کو
کہ اُس کی ذات ہے منعم منان کہتے ہیں
زمین کی گئی تنگ اُس پہ جس نے مان لیا
کہ ہوتا آیا یہی امتحان کہتے ہیں
ذرا سُنو تو سہی بات اُس نے کیا کی ہے
بہت سے لوگوں نے دی اُس پہ جان کہتے ہیں
ہیں ناصر اُس کے بڑے، طفل وزن خدا کے غلام
ہیں اُس کے ہو گئے خادم جوان کہتے ہیں
سُنو صدا، کہ مسیحا علاج کرنے کو
وہیں پہ آیا جو دارالامان کہتے ہیں
(ڈاکٹر طارق انور باجوہ۔ لندن)
