جو سورج چاند تاروں میں بسی ہے
ترے چہرے کی ذاتی روشنی ہے
میں نازاں ہوں کہ میں خیر الامم ہوں
محمد مصطفے میرا نبی ہے
تری خاطر بنے ہیں آسماں سب
تری خاطر ہی یہ دنیا سجی ہے
تری رحمت کے چرچے چار سو ہیں
تری امت سے دنیا کیوں ڈری ہے
تو ہی وہ جادو گر ہے، یہ عجب ہے
وہاں حیران اک بڑھیا کھڑی ہے
ہے یومِ فتحِ مکہ اور عدو ہیں
معافی عام ہے، اتنا سخی ہے
تجھے ختمِ نبوت سے نوازا
ترا ہی فیض ہے جو آخری ہے
تجھے پا کر خدا جو مل گیا ہے
تری ہم پر نوازش یہ بڑی ہے
ترے نقشِ قدم پر جو چلے گا
ابو بکر و عمر، عثماں، علی ہے
معوذ اور معاذ اپنے عزائم
تو طلحہ ہاتھ اپنا آہنی ہے
تری میں نعت لکھوں تو لگا یوں
تری مجھ پر عنایت دائمی ہے
فراز! اب حرفِ آخر بھی کہو نا!
خدا اور پھر محمد ہی سبھی ہے
(اطہر حفیظ فراز)
