محبت کا ہنر ہم نے زمانے کو سکھانا ہے
ہر اک نفرت کو دنیا سے بہر صورت مٹانا ہے
دکھا کر خُلق اچھے سب جہاں میں پھیل جانا ہے
رسولِ پاکؐ کے قدموں میں سب کو کھینچ لانا ہے
جہانِ نَو کو پھر وحدت کا اک مرکز بنانا ہے
چلو سب مل کے کرتے ہیں دعا کے ساتھ بسم اللہ
مصاحب چھپ کےبھی اکثر دلوں پر وار کرتے ہیں
ستم کرنے میں وہ بے شک حدوں کو پار کرتے ہیں
حریفانِ ہدیٰ سچوں کا جب انکار کرتے ہیں
خدا والے انہی لوگوں سے بڑھ کر پیار کرتے ہیں
ہمیں ان گم شدہ قدروں کو واپس ڈھونڈ لانا ہے
چلو سب مل کے کرتے ہیں دعا کے ساتھ بسم اللہ
مکیں ہیں لامکاں جبکہ گھروں پر ڈر کا قبضہ ہے
نظر پر جہل کا پہرہ تو دل پر زر کا قبضہ ہے
طلوعِ فجر کے سورج پہ طاقتور کا قبضہ ہے
زمیں جب سے ہوئی آباد اس پر شر کا قبضہ ہے
کسی صورت بھی اب ابلیس کو ہم نے بھگانا ہے
چلو سب مل کے کرتے ہیں دعا کے ساتھ بسم اللہ
فسوں نے موج ومستی کی پذیرائی میں حد کر دی
جنوں نے بت پرستی کی شناسائی میں حد کر دی
خزانہ لوٹ کر حاکم نے مہنگائی میں حد کر دی
تو دیں کی مولوی نے آ کے رسوائی میں حد کر دی
ہمارا کام سب بھٹکے ہوؤں کو رہ پہ لانا ہے
چلو سب مل کے کرتے ہیں دعا کے ساتھ بسم اللہ
دلِ بے بس میں جاری آنکھ کی برسات کے اندر
کدورت سے بھرے لہجوں کے مفروضات کے اندر
دیارِ نفس میں غفلت کی مکروہات کے اندر
نقاش اجڑے ہوئے ہر شہر کے کھنڈرات کے اندر
محبت سویا جذبہ ہے جسے ہم نے جگانا ہے
چلو سب مل کے کرتے ہیں دعا کے ساتھ بسم اللہ
(مدثر احمد نقاؔش)
