اُٹھو نیکی کمانے میں کبھی دیر نہ کرنا
جفائیں بھول جانے میں کبھی بھی دیر نہ کرنا
مریضِ لا دوا کو رات کا گریہ شفاء دے گا
یہ نسخہ آزمانے میں کبھی بھی دیر نہ کرنا
تمہیں شامل کرے گا ایک دن وہ سر بلندوں میں
مگر سر کو جھکانے میں کبھی بھی دیر نہ کرنا
تمہارے واسطے جلدی کھلے یا دیر سے وہ در
اُسے تم کھٹکھٹانے میں کبھی بھی دیر نہ کرنا
وہ مالک ہے دُعا سن لے گا تیری جب وہ چاہے گا
مگر تُو ہاتھ اُٹھانے میں کبھی بھی دیر نہ کرنا
میں خالی ہاتھ تیرے در پہ یا رب آن بیٹھا ہوں
میری بگڑی بنانے میں کبھی بھی دیر نہ کرنا
میرے پھیلے ہوئے ہاتھوں کی رکھ لے لاج اے مولا
خدارا! مان جانے میں کبھی بھی دیر نہ کرنا
میرے سجدے میری بخشش کا باعث بن نہیں سکتے
تُو مجھ پہ رحم کھانے میں کبھی بھی دیر نہ کرنا
بہت اب ہو چکی مالک بخش دے سب خطاؤں کو
میری خوشیاں لوٹانے میں کبھی بھی دیر نہ کرنا
تیرے ’’کن‘‘ کی تمنا دل میں لے کر جی رہے ہیں ہم
تُو ہونٹوں کو ہلانے میں کبھی بھی دیر نہ کرنا
تیرے فضلوں کی بارش کی تمنا کرتا ہے ساجدؔ
گھٹائیں لے کے آنے میں کبھی بھی دیر نہ کرنا
(قریشی داؤد احمد ساجد۔اسکاٹ لینڈ)
