نماز تہجد کی دعائیں
حضرت عائشہؓ نے رسول کریمﷺ کی تہجد کے آغاز میں دُعاؤں کا ذکر کرتے ہوئے بتایا ہے کہ آپ کھڑے ہو کر دس دس مرتبہ اَللّٰہُ اَکبَرُ، اَلْحَمْدُ لِلّٰہِ، سُبْحَانَ اللّٰہِ،لَا اِلٰہَ اِلَّا اللّٰہُ پڑھتے اور دس مرتبہ استغفار کرتے اس کے بعد بعض اور دُعائیں پڑھتے۔
(نسائی کتاب قیام اللیل)
حضرت عبداللہ بن عمرؓ کہتے ہیں کہ ایک دفعہ ہم رسول کریمﷺ کے ساتھ نماز پڑھ رہے تھے کہ ایک شخص نے آکر یہ کہہ کر نماز شروع کی۔
اَللّٰہُ اَکْبَرُ کَبِیْرًا وَالْحَمْدُ لِلّٰہِ کَثِیْرًا وَ سُبْحَانَ اللّٰہِ بُکْرَۃًوَّاَصِیْلًا
اللہ سب سے بڑا ہے بہت بڑااور سب تعریفیں اسی کے لئے ہیں بہت زیادہ اور اس کی ذات پاک ہے صبح بھی اور شام بھی۔
نماز کے بعد رسول کریمﷺ نے فرمایا کہ یہ کلمے خدا کو ایسے پیارے لگے کہ آسمان کے دروازے ان کے لئے وا کر دیئےگئے۔ ابن عمرؓ کہتے ہیں کہ اس کے بعد میں ہمیشہ یہ کلمے نماز میں دہراتا ہوں۔
(ترمذی کتاب الدعوات)
(مناجات رسولؐ از خزینۃ الدعا مرتبہ علامہ ایچ ایم طارق ایڈیشن2014ء صفحہ68-69)
(مرسلہ: عائشہ چوہدری۔ جرمنی)
