میرے آقا کو مولا شفا بخش دے
عشق ہی بس دکھاتا ہے یہ معجزہ
چوٹ اُن کو لگی درد مجھ کو ہوا
کیسے زخمی کیا اس خبر نے مجھے
میرا دل جانتا ہے یا میرا خدا
آڑے آتی نہ گر میرے قیدِ قفس
ملنے جاتا ہواؤں میں اُڑتا ہوا
نام لے کے میرا مجھ کو آواز دے
ساری دنیا میں بس اک وہی آشنا
ان کی راہوں میں آنکھیں بچھاتا رہوں
خاک رستوں کی ہو میرے سر کی ردا
میرے آقا کو مولا شفا بخش دے
ہے کروڑوں دلوں کی دُعا ، التجا
شہرِ مرشد میں قدسیؔ بنا جھونپڑی
آتے جاتے انہیں تُو رہے دیکھتا
(عبد الکریم قدسیؔ)
دعائیہ آزاد نظم
اے خدا! اے خدا!
اے خدا! اے خدا!
کرتا ہوں التجا
چہرہ دلدا ر کا
وہ مرے یار کا
تو ہمیں پھر دکھا
تو ہمیں پھر دکھا
اے خدا! اے خدا!
اے خدا! اے خدا!
دے دے اس کو شفا
آنسوؤں کی لڑی
آنکھوں میں ہے کھڑی
کر رہا ہوں دعا
اے خدا !اے خدا!
چہرہ دلدار کا
وہ مرے یار کا
تو ہمیں پھر دکھا
تو ہمیں پھر دکھا
اے خدا! اے خدا!
(سید سمیع الحسن شاہ حجازی)
میرے آقا کو شفا دے اے میرے پیارے خدا
صحت والی عمر دے تائید کر ان کی سدا
ان کا برکت والا سایہ قائم اور دائم رہے
ہم کو پیارے آقا سے ملتی رہے ہر دم دعا
ہم بھی مانگیں آقا کے حق میں دعائیں ہر گھڑی
اے خدا توفیق دے ہر احمدی کو یہ سدا
ہم خلافت سے محبت دمبدم کرتے رہیں
اور ہم کرتے رہیں اپنے خلیفہ سے وفا
(خواجہ عبدالمومن۔ناروے)
کسی زخمِ تَن کا آزار یہ
میرے ذہن و دِل پہ سوار ہے
میرے آسماں مجھے یہ بتا
کیا یہ عشق ہے یا کہ پیار ہے
اُسے دے شفا میرے چارہ گر
تجھے کہہ رہی میری چشمِ تر
جو دُعائیں دیتا ہے رات دن
وہ نِگار اپنا بیمار ہے
جو اُداسیوں کی ہوا چلی
تو دُعا کی کھڑکی ہر اک کُھلی
دلِ مُضطرب نہ ہو مُضمَحِل
لے کے آ رہا وہ قرار ہے
نہ ہی عاشقوں کی کمی رہی
نہ ہی صادقوں کی کمی رہی
تیرے سلسلہ پہ مِرے خُدا
دلِ عاشقاں یہ نثار ہے
تیرے دَر پہ سَر ہیں جُھکے ہوئے
لئے کاسَہ خالی کھڑے ہوئے
یہ کون زخمی ہے گُلبدن
جو شفا شفا کی پُکار ہے
میرے کافِیّہ میرے شافِیَہ
میرے کبِریا میرے ساقِیّہَ
دے اِمامِ وقت کو تُو شفا
تیرے ہاتھ میں ہی مہار ہے
( عبدالجلیل عبادؔ۔جرمنی)
حضورانورکوچوٹ لگنے کی اطلاع ملنے پر
میرے مولا میں بے شک گنہگار ہوں
تیرے کرموں کا پھر بھی طلب گار ہوں
میرے آقانہ دیکھیں کبھی کوئی غم
نہ آئے قریب ان کے کوئی الم
جو چوٹیں لگیں ان کو مجھ کو لگیں
وہ اداس اور غمگیں مجھے کر گئیں
ہم تو کمزور ہیں اور نادان ہیں
پھر بھی آقا پہ ہر آن قربان ہیں
تڑپتے ہیں سجدوں میں روتے ہیں ہم
ہم فقیروں کا مولیٰ تو رکھ لے بھرم
شفادے توشافی ہے میرے خدا
نہیں اور کوئی جو دے دے شفا
مخالف ہیں جو سالہا سال سے
شماتت کا موقع نہ تو ان کو دے
وہ نہیں جانتے کہ خلیفہ ہے کیا
یہ عرفان اُن کو بھی کر دے عطا
بتاا ُن کو آقا کی کیا شان ہے
شمس کا ہے وہ دل شمس کی جان ہے
(ڈاکٹر محمد جلال شمسؔ۔یو کے)
