محض اللہ تعالیٰ کے فضل اور حضرت امیر المومنین خلیفۃ المسیح الخامس ایدہ اللہ تعالیٰ بنصرہ العزیز کی رہنمائی میں جماعت احمدیہ روز افزوں ترقی کی راہ پر گامزن ہے۔ گزشتہ چند مہینوں سے کورونا وائرس کی وبا نے ساری دنیا کو اپنی لپیٹ میں لے کر جس طرح مفلوج کیا وہ اپنی مثال آپ ہے۔ اس وبا اور اس کے نتیجے میں ہونے والے معاشی بحران کے باوجود جماعت احمدیہ کا قدم ہرآن اورہر لمحہ اپنی منزل کی جانب آگے بڑھ رہا ہے۔
مذکورہ بالا پس منظر کے باوجود حضور انور ایدہ اللہ تعالیٰ بنصرہ العزیز نےاز راہ شفقت مجلس انصار اللہ سینیگال کو اپنا سالانہ اجتماع مؤرخہ 30تا31؍اکتوبر 2020ء کو حکومت کی طرف سے جاری کردہ احتیاطی تدابیر اور پابندیوں کے مطابق منعقد کرنے کی اجازت عطا فرمائی۔
امسال جماعتی کیلنڈر 2020ء مرتب کرتے ہوئےامیر جماعت سینیگال مکرم ناصر احمد سدھو صاحب نے یہ ہدایت جاری کی تھی کہ امسال نیشنل اجتماع انصار اللہ سینیگال تانباکنڈا ریجن (Tambacounda) میں منعقد ہو گا۔
چنانچہ مقررہ تواریخ سے ایک ماہ قبل ہی ریجنل سطح پر ریجنل زعیم انصاراللہ مکرم سالف والی صاحب اور لوکل معلم مکرم بدرا سار صاحب کی سرکردگی میں ایک کمیٹی قائم ہوئی۔ اس کمیٹی کی تین میٹنگز ہوئیں جن میں اجتماع سے متعلقہ انتظامات و تیاری کا جائزہ لیا گیا۔
مؤرخہ 29؍اکتوبر بروز جمعرات کو ہی مجلس انصاراللہ کے ممبران دیگر ریجنز مثلاً
Dakar (465km),
Zinginchour (435km),
Theis (380km)
& Saint Louis (525km)
سے آنا شروع ہو گئے تھے۔
مؤرخہ 30؍اکتوبر2020ء کو مکرم امیر صاحب سینیگال نے خطبہ جمعہ کے ذریعہ اجتماع کا افتتاح کیا اور انصار کو ان کی ذمہ داریوں کی طرف توجہ دلائی۔
بعد ازاں انصار کے مابین 8 ورزشی مقابلہ جات کروائے گئےجن میں کلائی پکڑنا، میوزیکل چیئر، ریلے ریس، 100 میٹر دوڑ، فٹ بال اور دیگر مقابلہ جات شامل تھے۔
نمازمغرب و عشاء کے بعدانصار کے مابین علمی مقابلہ جات کروائے گئےجن میں تلاوت، حفظِ قرآن، دینی معلومات وغیرہ شامل تھے۔اگلے دن بروز ہفتہ دیگر ورزشی مقابلہ جات کروائے گئے۔ بعد ازاں ایک طویل مجلس سوال و جواب منعقد کی گئی۔
اس کے بعد مکرم یونس بوجاں صاحب صدر مجلس انصار اللہ سینیگال نے نمایاں کامیابی حاصل کرنے والے انصار میں انعامات تقسیم کیے۔ اختتامی تقریب کے بعد تمام حاضرین کی خدمت میں طعام پیش کیا گیاجس کے بعد تمام انصار اپنے گھروں کی طرف روانہ ہوگئے۔
شعبہ رجسٹریشن کے مطابق انصار کی تعداد 211 رہی اور دیگر معاونین خدام کو ملا کر کل تعداد 250 سے زائد رہی جو کہ گزشتہ سال کی تعداد سے دو گنی ہے۔ الحمدللہ علی ذالک
دعا ہے کہ اللہ تعالیٰ اس اجتماع کو انصار کی تربیتی و تعلیمی لحاظ سے ترقی کا ذریعہ بنائے۔ آمین
(رپورٹ: حافظ مصور احمد مزمل۔ مربی سلسلہ سینیگال)
