جماعتِ احمدیہ خدا تعالیٰ کے فضل سے دنیا بھر میں انسانیت کو دینِ حق کی طرف لانے کے ساتھ ساتھ فلاحی کاموں میں بھی نمایاں کردار ادا کر رہی ہے۔ اسی سلسلہ کی ایک کڑی بینن میں ماڈل ولیج کا افتتاح بھی بنی۔ چنانچہ مورخہ14 نومبر 2021 بروز اتوار IAAAE کے زیر انتظام ماڈل ویلیج Gbyekerou کی تقریب افتتاح ہوئی جس میں علاقے کے مئیر کے ساتھ ساتھ وہاں کے بادشاہ اورپولیس کے سربراہ نے شرکت کی۔ اسکے ساتھ ساتھ وہاں400سے زائد احبا ب نے شرکت کی۔
اس ماڈل ویلج میں 80گھروں میں بجلی فراہم کی گئی۔ ہر گھر کو سولر انرجی سے چلنے والے 3بلب لگائے گئے، موبائل چارج کرنے جیسے کاموں کے لئے ایک ساکٹ بھی لگایا گیا۔ اسکے علاوہ 10سٹریٹ لائیٹس لگائی گئی۔ پانی کی فراہمی کے لئے بور ہول کرکے موٹر اور بڑی ٹنکی لگائی گئی جس سے 6 مختلف پوائنٹس پر پانی کے نل لگائے گئے ان میں سے ایک کونیکشن وہاں کے سکول کو بھی دیا گیا۔
افتتاحی تقریب کاآغاز تلاوت قرآن سے ہواجس کے بعد معزز مہمان اور میئر صاحب نے جماعت احمدیہ کی انسانی خدمت کی کاوشوں کو سراہا۔ میئر صاحب TCHAOUROU نے کہا کہ ہم احمدیت کی ان خدمات کو عرصہ دراز سے جانتے ہیں اور ہم سمجھتے ہیں کہ احمدیت ہمارے لئے ہے اور ہم انکے لئے ہیں۔ اس گاؤں میں جماعت نے جو انسانیت کی یہ خدمت کی ہے یہ قابل ستائش ہے انہوں نے ان کاوشوں پر حضورانورایدہ اللہ تعالیٰ کا، IAAAE کی طرف سے آئے ہوئے انجینئرز اور جماعت کے ہر کارکن کا تہہ دل سے شکریہ ادا کیا، سب کیلئے محبت کا اظہار اور دعائیہ کلمات کہے۔ چیئر مین IAAAE مکرم اکرم احمدی صاحب نے سب کو بتایا کہ حضرت مسیح موعود ؑ کی آمد کا مقصد انسانیت کی خدمت تھا اور جماعت جواصل اسلام کا چہرہ ہے اللہ تعالیٰ کے فضل سے افریقہ کے ممالک میں غریب انسانیت کی خدمت کر رہی ہے اور انہوں نے بتایا کہ یہ پراجیکٹ ابھی ختم نہیں ہوئے مستقبل میں کمیونٹی سینٹر اور دیگر پراجیکٹ مکمل کیے جائیں گے۔ ہیومینٹی فرسٹ جرمنی کے چیئر مین مکرم ڈاکٹر اطہر زبیر صاحب نے بھی اپنی تقریر میں کہا COVID-19 کے حالات کے باوجود جماعت کی انسانی خدمات کو جاری رکھنا خلیفہ وقت کی افریقہ سے محبت اور انسانیت سے ہمدردی ہے اور اس گاؤں میں ہونے والا فیر میڈیکل کیمپ بھی اسی کی ایک کڑی ہے انہوں نے ملک کے صدر اور وزیر صحت کا شکریہ ادا کیاجنہوں نے موجودہ حالات کے باوجود جماعت کو ان خدمات کے مواقع فراہم کیے۔ اس کے بعدامیر صاحب بینن نے شرکاء کو سارے پراجیکٹ کے بارے میں بریفنگ دی اور بتایا کہ جماعت احمدیہ کا مشن ہر رنگ و نسل کے انسانوں کی خدمت کرنا ہے۔ انسانی خدمات ہیں اورجس اس کے بعد اس ماڈل ویلج کا افتتاح کیا گیا اور بجلی پانی کی سہولیات اس گاؤں کے ہر باسی کیلئے کھول دی گئی جس پر فضا نعرہ تکبیر سے گونج اٹھی۔
اس تقریب کے بعد مئیر آف Tchouraou نے اس سارے پراجیکٹ کا وزٹ کیا اور میڈیکل کیمپ میں شامل ڈاکٹرز کی بھی حوصلہ افزائی کی اور بہت خوشی کا اظہار کیا اور کہا کہ مجھے اس بات پر فخر ہے کہ آپ ہمارے لئے بغیر مانگے ان خدمات کو سرانجام دے رہے ہیں۔ اس کیمپ میں 350سے زائد مریضوں نے استفادہ کیا۔ دیگر امراض کے ساتھ دانتوں کے امراض میں لاحق افراد کو مفت ادوایات فراہم کی گئیں اسی طرح بچوں کو دانتوں کی صفائی کیلئے ٹریننگ دی گئی اور حاملہ خواتین میں مفت مچھردانیاں تقسیم کی گئیں۔
اس سارے پروگرام کو ملکی سب سے بڑے اخبار La Nation اور نیشنل ٹی وی چینل ORTB اور CANAL 3 نے بھی کوریج دی۔
(مرزا فرحان احمد بیگ۔ نمائندہ الفضل آن لائن بینن)
