مکرم انیس احمد مبلغ سلسلہ سیرالیون تحریر کرتے ہیں کہ
محض اللہ تعالیٰ کے فضل وکرم سے مورخہ 26 نومبر بروز جمعة المبارک جماعت احمدیہ کیلاہوں کو تبلیغی سٹال لگانے کی توفیق ملی۔ الحمد للّٰہ علی ذالك۔
تبلیغی سٹال سے چند روزقبل جگہ کا تعین اور تیاری شروع کر دی گئی۔ سٹال کے لئے کیلاہوں ٹاؤن کی معروف شاہراہ منتخب کی گئی۔ اور جمعة المبارک کے دن کا انتخاب کرنے میں یہ حکمت پیش نظر تھی کیونکہ اس دن اردگرد کے دیہات سے لوگوں کی ایک بڑی تعداد نماز جمعہ کی ادا ئیگی کے لئے ہمارے ٹاؤن کا رخ کرتی ہے ۔
26 نومبر بروز جمعة المبارک بعد از نمازفجرخدام اور سرکٹ مشنریز کی مدد سے تبلیغی سٹال کو ترتیب دیا گیا ۔ سٹال کے بیگراونڈ میں حضرت مسیح موعود علیہ الصلوةوالسلام کی تصویر آویزاں کی گئی جس پر انگریزی زبان کے جلی حروف میں لکھا تھا Long awaited Promised Messiah & Imam Mahdi has come اسی طرح دوسرا بینر جماعت احمدیہ سیرالیون کےسوسال مکمل ہونے کے متعلق آویزاں کیا گیا ۔ سٹال کا آغاز صبح 9:00 بجے اجتماعی دعا سے کیا گیا ۔ سٹال پریسرنا القرآن، قرآن کریم ،قرآن کریم کی ڈکشنری و کتب حضرت مسیح موعود علیہ الصلوةوالسلام و خلفائے سلسلہ احمدیہ و دیگر رسائل جس میں التقوی اور ریویو آف ریلیجن شامل تھے برائے نمائش و فروخت رکھے گئے ۔ اسی طرح لوگوں میں اسلام احمدیت سے متعلق فلائرز و لٹریچر مفت بھی تقسیم کیا گیا۔ سٹال پر آنے والے لوگوں کو مقامی زبان میں جماعت احمدیہ کا تعارف کروایا گیا نیز انکے سوالات کے جوابات دیئے گئے۔ کافی لوگ ہمارے سٹال پر آئے ۔ لوگوں نے اس سٹال کو بہت سراہا ۔ اس سٹال کے ذریعہ کم وبیش ٹاؤن کے 350 افراد تک پیغام حق پہنچا ۔اور ایک ہزار کے قریب مختلف فلائرز اور لٹریچر تقسیم کیا گیا ۔ الحمدللّٰہ یہ تبلیغی سٹال کامیاب رہا۔ احباب جماعت سے دعا کی عاجزانہ درخواست ہے کہ الله تعالیٰ ہماری ادنی کاوشوں کے نیک نتائج پیدا فرمائے اور لوگوں تک اسلام احمدیت کا پیغام کما حقہ پہنچانے کی توفیق عطا فرمائے اور اللہ تعالیٰ جماعت احمدیہ میں نیک اور سعید روحوں کو داخل ہونے کی توفیق عطا فرمائے۔آمین
(انیس احمد ۔ مبلغ سلسلہ سیرالیون)
